ტიტების დამაჯერებელი გამარჯვება ბათუმთან

ოლიმპიურ სასახლეში დღეს დაგეგმილი სუპერლიგის 2 მატჩიდან 1 უკვე დასრულდა. “ტიტებმა” “ბათუმს” უმასპინძლეს და დამაჯერებელი სხვაობით – 97:82 (სტატისტიკა) დაამარცხეს. როგორც ჩანს, ამ შეხვედრას ბათუმელებისთვის არ ჰქონდა პრინციპული მნიშვნელობა, რადგან სამწვრთნელო შტაბმა 2 ლიდერი – საბა ლობჯანიძე და ბექა ბექაური დაასვენა, გუნდის დანარჩენ წამყვან მოთამაშეებს კი სათამასო დრო დაახლოებით თანაბრად გადაუნაწილდათ. 

“ტიტებმა” შანსი ხელიდან არ გაუშვა და მორიგი გამარჯვება მოიპოვა, რითაც ცხრილში მე-6 ადგილი გაიმყარა. ბესო ლეჟავას გაწვრთნილმა გუნდმა თავიდანვე რომ მოიპოვა უპირატესობა, მატჩის სადავეები ხელიდან აღარ გაუშვია. მხოლოდ ბოლო პერიოდი დასრულდა ფრედ, ყველა დანარჩენი “ტიტებმა” მოიგო და დამაჯერებელი გამარჯვება გაიფორმა. 

თბილისურ გუნდს 25 ქულითა და 20 მოხსნით ჯავიონ ოგუნიემიმ ულიდერა. 20 ქულა და 12 პასი ისააკ ასრატის ანგარიშზეა. 19 ქულითა და 7 პასით დაასრულა შეხვედრა კრისტოფერ პარკერმა. “ბათუმში 19 ქულა ჰქონდა დე ანჯელო სტიუარტს, ხოლო ლევან ელიაძის ანგარიშზე 15 ქულა დაგროვდა.