გალერეა
სტატისტიკა LIVE!18-წლამდე გოგონათა ევროპის ჩემპიონატის C დივიზიონი სომხეთმა
მოიგო. საქართველოს ნაკრებმა ვერ მოახერხა ფინალურ მატჩში გამარჯვება და ტიტულთან ერთად
B დივიზიონის საგზურიც
დაკარგა.
საქართველო და სომხეთი წაუგებლად მივიდნენ ფინალამდე,
სადაც ფავორიტი გამოკვეთილი არ იყო, თუმცა თამაშმა საწინააღმდეგო გამოაჩინა. სომხეთის
ნაკრებმა ისე დაიწყო შეხვედრა, მასპინძლებისთვის შანსი არ მიუციათ. ჩვენი მეზობლები
შორი თუ ახლო დისტანციებიდან წარმატებით ესროდნენ, ხოლო ფარქვეშ ქართველებს შანსს არ
უტოვებდნენ და პირველი პერიოდის ბოლოს 22:2 დაწინაურდნენ.
მეორე ათწუთეულში ქართველებმა თამაში ოდნავ გამოასწორეს,
თუმცა ისე ვერა, რომ ჩამორჩენა შეემცირებინათ. დიდი შესვენების შემდეგ სომხები
50:15 დაწინაურდნენ და მატჩის ბედიც გადაწყვიტეს.
საბოლოოდ სომხებმა 66:32 მოიგეს და C დივიზიონის ჩემპიონის ტიტულსაც დაეპატრონნენ. საქართველოს ნაკრებში 10-ქულიან ზღვარს ნატალი ოთხმეზური მიუახლოვდა,
რომელმაც 9 ქულა მოაგროვა. 6 ქულა ჰქონდა ელენე ილურიძეს, ხოლო ვიქტორია გეგეშიძის
ანგარიშზე 5 ქულა დაგროვდა. ჩემპიონებს 19 ქულით დიანა რამაზიანმა ულიდერა.
ტურნირის პარტნიორის საჩუქრები პრიზიორ გუნდებს
მესამე ადგილისთვის მატჩში მალტამ ანდორას 71:63 აჯობა
და ბრინჯაოს მედლებს დაეპატრონა. ამ შეხვედრის შემდეგ, სანამ ფინალური მატჩი დაიწყებოდა,
პრიზიორი გუნდების წევრები ტურნირის პარტნიორმა – ფარმაცევტულმა კომპანია „პე-ეს-პემ“
დააჯილდოვა. გოგონებს სასაჩუქრე ჩანთები კომპანიის საზოგადოებასთან ურთიერთობის მენეჯერმა
ნათია ხაბეიშვილმა გადასცა.
ფინალური მატჩის შემდეგ გაიმართა დაჯილდოების
ცერემონიალი, რომელზეც ფიბა-ს აღმასრულებელმა დირექტორმა კამილ
ნოვაკმა და კალათბურთის ფედერაციისა და სპორტის სამინისტროს ხელმძღვანელებმა პრიზიორები
და გამორჩეული მოთამაშეები დააჯილდოვეს.
ფიბა-ს ჯილდო საორგანიზაციო კომიტეტს
პირველ რიგში კამილ ნოვაკმა ადგილობრივი საორგანიზაციო
კომიტეტის თავჯდომარე, ზვიად კოტრიკაძე ტურნირის მაღალ დონეზე ჩატარებისთვის საგანგებო
პრიზით დააჯილდოვა.
Fair Play
პრიზი სამართლიანი თამაშისთვის უელსის გუნდს გადაეცა.
საქართველოს კალათბურთის ფედერაციის გენერალურმა მდივანმა და ფიბა-ევროპის იურიდიული
კომიტეტის წევრმა გიორგი ქართველიშვილმა Fair
Play-ის
პრიზი უელსელთა კაპიტან ემილი სტრადლინგს გადაულოცა.
სიმბოლური ხუთეული
ტურნირის საუკეთესო ხუთეულში 1 ქართველი, ნატალია ოთხმეზური
შევიდა. დანარჩენი 4 ადგილი ერგოთ მოთამაშეებს: სოფი აბელა (მალტა), ანა ასლანიანი
(სომხეთი), ჰანა ალ-ტუმი (მალტა) და ადეა კასტრადი (კოსოვო). სიმბოლურ ხუთეულის წევრები
პრიზებით საქართველოს კალათბურთის ფედერაციის გენერალურმა მდივანმა და ფიბა-ევროპის
იურიდიული კომიტეტის იურიდიული კომიტეტის წევრმა გიორგი ქართველიშვილმა დააჯილდოვა.
MVP
ტურნირის საუკეთესო მოთამაშედ დასახელდა კალათბურთელი,
რომელმაც ტურნირის მსაჯებისა და კომისრის გამოკითხვაში ყველაზე მეტი ხმა მიიღო. MVP-ის ტიტულის მფლობელი
გახდა საქართველოს ნაკრების ლიდერი, ნატალია ოთხმეზური. ტურნირის უძვირფასეს მოთამაშეს
საგანგებო პრიზი გადასცა საქართველოს კალათბურთის ფედერაციის გენერალურმა მდივანმა
და ფიბა-ევროპის იურიდიული კომიტეტის იურიდიული კომიტეტის წევრმა გიორგი ქართველიშვილმა.
ბრინჯაოს პრიზიორები
მესამე ადგილზე გასული მალტის ნაკრების მწვრთნელ-მოთამაშეები
ბრინჯაოს მედლებით სპორტისა და ახალგაზრდობის საქმეთა მინისტრის მოადგილემ შალვა გოგოლაძემ
და ადგილობრივი საორგანიზაციო კომიტეტის ხელმძღვანელმა, ზვიად კოტრიკაძემ დააჯილდოვეს.
ვერცხლის პრიზიორები
ფინალში დამარცხებული საქართველოს ნაკრების წევრები
ბრინჯაოს პრიზიორთა მსგავსად სპორტისა და ახალგაზრდობის საქმეთა მინისტრის მოადგილემ
შალვა გოგოლაძემ და ადგილობრივი საორგანიზაციო კომიტეტის ხელმძღვანელმა, ზვიად კოტრიკაძემ
დააჯილდოვეს.
საჩემპიონო მედლები
გამარჯვებულ სომხეთის ნაკრებს ოქროს მედლები ერგოთ,
რომლებიც ჩემპიონი გუნდის წევრებს ფიბა-ს აღმასრულებელმა დირექტორმა კამილ ნოვაკმა
და საქართველოს კალათბურთის ფედერაციის პრეზიდენტმა, ფიბა-ევროპის ახალგაზრდული კომიტეტის
წევრმა, მიხეილ გაბრიჩიძემ გადასცეს.
ფიბა-ს თასი
ფიბა-ს მიერ საგანგებოდ მოწოდებული და C დივიზიონის გამარჯვებულისთვის
განკუთვნილი საჩემპიონო თასი სომხების კაპიტან
ანა ოჰანიანს ფიბა-ს აღმასრულებელმა დირექტორმა კამილ ნოვაკმა ჩააბარა.
მიხეილ გაბრიჩიძე (კალათბურთის ეროვნული ფედერაციის პრეზიდენტი): ეს იყო ჩვენი პირველი ნაბიჯები ევროპის ქალთა კალათბურთში. გოგონებმა ბოლომდე იბრძოლეს და ფინალში გავიდნენ, რაც საკმაოდ კარგი შედეგია. ჩვენი ნაკრები გაცილებით ძლიერ სომხეთს დაუპირისპირდა. ვფიქრობ აღნიშნული ტურნირი ჩვენი მომავალი წარმატებების საწინდარი იქნება.
კამილ ნოვაკი (ფიბას აღმასრულებელი დირექტორი): საქართველომ პირველად უმასპინძლა კალათბურთში ევროპის ჩემპიონატს 18-წლამდე გოგონათა შორის და წარმატებით გაართვა თავი. საორგანიზაციო კომიტეტმა შესანიშნავად იმუშავა და ვფიქრობ, მომავალში საქართველო ვაჟებს შორისაც უმასპინძლებს ევროპის ასაკობრივ ჩემპიონატებს.
სომხეთი – საქართველო 66:32
ლელა ცანავა
(საქართველოს ნაკრების მთავარი მწვრთნელი):
– სომხეთის ნაკრებს 2 თვის წინ ერევანში მოვუგეთ, მაგრამ გვითხრეს, რომ ამერიკიდან და რუსეთიდან სომხური დიასპორის წარმომადგენლებს იმატებდნენ
და ყველამ ვნახეთ, თუ რა ძლიერი გოგოები არიან ისინი. გარდა ამისა, ჩვენი გოგოები მეტოქეზე
1-2 წლით პატარები არიან და ასაკში ეს სხვაობა გადამწყვეტი ფაქტორი აღმოჩნდა. სამწუხაროა,
რომ წავაგეთ და თბილისიდან თასი გავატანეთ, თუმცა რას ვიზავთ, უნდა მოვემზადოთ, რათა
მომავალში მეტი წარმატებით ვითამაშოთ.
ნატალია ოთხმეზური
(საქართველოს ნაკრების წევრი, ტურნირის MVP):
– გულდაწყვეტილი
ვარ წაგებით, მაგრამ მეამაყება ჩემი გუნდის და გუნდელების. რომ არა გადაღლილება და
დაბნეულობა, წარმატებაზე ფიქრი შეიძლებოდა. სომხეთის ნაკრები არ იყო დაუმარცხებელი,
მაგრამ დღეს ჩვენი დღე არ იყო. რაც შეეხება საუკეთესო მოთამაშის პრიზს, ძალიან გამიხარდა,
რომ ჩემი მოწადინება დაფასდა.
ალბერტ ჰარუთინიანი (სომხეთის დელეგაციის ხელმძღვანელი)
– პირველ რიგში, ძალიან დიდი მადლობა ყველას! ეს არის პირველი ტიტული სომხეთისთვის საერთაშორისო
ასპარეზზე კალათბურთში, პირველი ევროპის ჩემპიონატი. მისია შესრულებულია ამ მხრივ და
ძალიან ამაყები ვართ, არა იმიტომ რომ მოიგეს, არა იმიტომ რომ პირველად გაიმარჯვეს. ძალიან გულიანად ითამაშეს და ყველაფერი გააკეთეს რათა კარგი შედეგი ეჩვენებინათ. ჩინებული დაცვა და შეტევა გვქონდა. არ მახსენდება არცერთი თამაში ამ ჩემპიონატზე, სადაც
ჩვენმა გუნდმა ცუდად იასპარეზა. გოგონები ყოველთვის მოტივირებული იყვნენ და დიდ მადლობას გადავუხდი მათ!
ანა ასლანიანი (სომხეთის ნაკრების მოთამაშე):
-არ ვიცი, რა უნდა ვთქვა, სიხარულისგან
სიტყვები არ მყოფნის. ეს იყო საუკეთესო შანსი ჩვენთვის და გამოვიყენეთ. ვფიქრობ
ვინც მხარს გვიჭერდა ყველა გავახარეთ. მადლობა ყველას.
