“კაკტუსმა” “ბათუმი” ბოლო წუთებზე გატეხა

სუპერლიგის ცხრილის შუაში, მეზობლად მყოფი გუნდების მატჩი დაძაბული გამოდგა. “კაკტუსსაც” და “ბათუმსაც” გამარჯვება ძალიან სჭირდებოდათ. ბათუმელებს მოგება “კაკტუსთან” ათანაბრებდა, თუმცა ბოლო წუთებზე ძალები აღარ ეყო და შეხვედრა 9 ქულით – 61:70 დათმო.

მართალია, კაკტუსელები თავიდანვე გალიდერდნენ და უპირატესობას ინარჩუნებდნენ, მაგრამ “ბათუმი” არ რჩბოდა და პერიოდულად ანგარიშსაც ათანაბრებდა. მესამე პერიოდის ბოლოს ზღვისპირული გუნდი სირენის თანხლებით ჩაგდებული სამქულიანით სპენსერ კოლინსმა ბათუმელები 51:50 დააწინაურა. დასკვნით მეოთხედში თანაბარი თამაში გაგრძელდა და სავარაუდო იყო, რომ გამარჯვებული ბოლო წამებამდე არ გამოვლინდებოდა. კაკტუსელებმა ბოლო 3 წუთი მეტოქეზე შედეგიანად ჩაატარეს და ისე გაიმარჯვეს, ბოლო 2 წუთში თამაში არც დაძაბულა.

“კაკტუსში” 18 ქულით და 12 მოხსნით საუკეთესო იყო ჯონ მიჩელი. 15 ქულა მოაგროვა დეანდრე პარკსმა, ხოლო 10 ქულა და 10 მოხსნა ტერიკ ბრიჯმენის ანგარიშზე დაგროვდა. “ბათუმში” 20 ქულით და 19 მოხსნით საუკეთესო იყო სტეფან ანდრეიევიჩი, ერიკ ჩილდრესმა კი შეხვედრა 13 ქულითა და 7-7 მოხსნა-პასით დაასრულა. 

 

არჩილ ჟღენტი, კაკტუსის მთავარი მწვრთნელი:

“ბოლო მატჩებისგან განსხვავებით ჩვენმა გუნდმა დაცვაში კარგად ითამაშა. შეტევაში გვქონდა ბევრი შეცდომები, მაგრამ კარგია, რომ ყველაფერი მოგებით დასრულდა და სატურნირო მდგომარეობის გაუმჯობესების საშუალებაც მოგვეცა”.

ვლადიმერ ბოსნიაკი, ბათუმის მთავარი მწვრთნელი:

“კომენტარის გაკეთება მიჭირს. ძალიან ცუდად ვითამაშეთ სწორედ მაშინ, როცა მატჩის ბედი წყდებოდა. დასანანი მარცხი განვიცადეთ, თუმცა წინ კიდევ საკმაოდ მატჩებია და ვეცდებით ვითარების გამოსწორებას”.

კაკტუსი – ბათუმი
სტატისტიკა: 70:61