policeacademy.gov.ge
შსს-ს აკადემიაში, პროექტის – „აკადემიის დღეები 2017“ – ფარგლებში, ჯანსაღი ცხოვრების წესის პოპულარიზების მიზნით, 3 კვირის განმავლობაში სხვადასხვა სპორტული შეჯიბრება ჩატარდა. სპორტულ ღონისძიებებში, აკადემიის ისტორიაში პირველად, მსმენელებთან ერთად, სამართლის ფაკულტეტის სტუდენტებისგან დაკომპლექტებული გუნდებიც მონაწილეობდნენ.შეჯიბრებები მკლავჭიდში, მძლეოსნობაში, ფეხბურთსა და კალათბურთში, საქართველოს ეროვნული ფედერაციის – „სპორტი ყველასათვის“, კალათბურთის, მკლავჭიდის და ფეხბურთის ფედერაციების მხარდაჭერით ჩატარდა. გამარჯვებულები შსს-ს აკადემის რექტორმა, გივი მიქანაძემ, საპატიო სტუმრებთან ერთად დააჯილდოვა. მკლავჭიდსა და მძლეოსნობაში 7 ოქროს, 9 ვერცხლის და 10 ბრინჯაოს მედალი გათამაშდა. ფეხბურთსა და კალათბურთში კი გამარჯვებულ გუნდებს სპეციალური თასები გადაეცათ. მინიფეხბურთში გამოვლინდა საუკეთესო მოთამაშე და ბომბარდირი.დაჯილდოების ცერემონიას საქართველოს ეროვნული ფედერაციის – „სპორტი ყველასათვის“ წარმომადგენელი – ალეკო ლეჟავა, კალათბურთის ფედერაციის პრეზიდენტი – მიხეილ გაბრიჩიძე, მკლავჭიდის ფედერაციის წარმომადგენელი, მსოფლიოს მრავალგზის ჩემპიონი – ჯამბულ ვიბლიანი და ფეხბურთის ფედერაციის წარმომადგენელი – კახა ჭუმბურიძე, ასევე, ვეტერანი კალათბურთელი – გივი ბიჭიაშვილი, ვეტერანი ფეხბურთელები – დავით მუჯირი და ნოდარ ხიზანიშვილი ესწრებოდნენ.რექტორმა სპორტის დამსახურებულ მოღვაწეებს მადლობა გადაუხადა აკადემიის სპორტული ღონისძიებების მხარდაჭერისთვის და ქართული სპორტის განვითარებაში შეტანილი წვლილისთვის. როგორც გივი მიქანაძემ აღნიშნა, შსს-ს აკადემიის ერთ-ერთ მთავარ პროორიტეტს ჯანსაღი ცხოვრების წესის პოპულარიზება წარმოადგენს, რადგან ფიზიკური მომზადების კომპონენტი ძლიერი პოლიციელების აღზრდის პროცესში მეტად მნიშვნელოვანია.აკადემიის რექტორმა სტუმრებს, მადლობის დიპლომებთან ერთად, აკადემიის ბრენდირებული სუვენირები გადასცა.
საქართველოს შსს აკადემია
https://www.facebook.com/Miapoliceacademy/
