ოლიმპმა სოხუმი მეორე ტაიმში გატეხა
მე-18 ტური “ოლიმპისა” და “სოხუმის” დაპირისპირებით დასრულდა. მიმდინარე ჩემპიონატის აუტსაიდერმა დიდი მონდომების მიუხედავად ვერაფერი გააწყო ტრავმებით დასუსტებულ “ოლიმპთან” და მე-17 მარცხი განიცადა.
არადა, სოხუმელებმა თამაში კარგად დაიწყეს და სოლიდურადაც დაწინაურდნენ. პირველი პერიოდის შემდეგ გია კაზანჯიანის გუნდი მხოლოდ 2 ქულას იგებდა, თუმცა მეორეში დაცვისა და ორგანიზებული შეტევის ხარჯზე ხელჩასაჭიდი უპირატესობა მოიპოვა. სოხუმელებმა მეორე ათწუთეული 10 ქულით – 26:16 მოიგეს და დიდ შესვენებაზე 12-ქულიანი ლიდერობით გავიდნენ – 50:38.
მე-3 პერიოდში ვითარება კარდინალურად შეიცვალა. “ოლიმპის” მოთამაშეებმა გაუვალი დაცვა დააყენეს და 12-ქულიანი ჩამორჩენა 3 წუთში გაქვითეს. ლეონიდ ივატინის გაწვრთნილმა “ოლიმპმა” ათწუთეული 26:14 მოიგო და ანგარიში გაათანაბრა – 64:64. ბოლო პერიოდში ოლიმპელებმა გააგრძელეს შედეგიანი თამაში და გამარჯვებამდე ისე მივიდნენ, ვითარება არც დაძაბულა – 94:78.
“ოლიმპში” 23 ქულით და 7 მოხსნით საუკეთესო იყო მორის ჰილი. 17 ქულა, 7 მოხსნა და 5 პასი ჰქონდა გივი ბაქრაძეს, ხოლო მერაბ ბოქოლიშვილის ანგარიშზე 16 ქულა დაგროვდა. “სოხუმში” 21 ქულით ბომბარდირი გახდა ბიშოპ დანიელსი. 20 ქულა მიითვალა სერგო ათუაშვილმა, ხოლო 10-10 ქულა ოთო ბულიავას და ჯორდან პრაისის ანგარიშზეა.
მატჩისშემდგომი კომენტარები:
დიმიტრი ჯაკობოვი – “ოლიმპის” მწვრთნელი:
“პირველ რიგში, მივულოცავ ჩვენს გუნდს საკმაოდ ძლიერი მეტოქის დამარცხებას. 5 წამყვანი მოთამაშე გვაკლდა ტრავმების გამო და ამის ფონზე ბიჭებმა კარგ შედეგს მიაღწიეს. საკვანძო გამოდგა მესამე პერიოდი, როცა ჩვენმა ბიჭებმა დაცვაში სამაგალითოდ ითამაშეს და სუპერლიგაში ზედიზედ განცდილი 3 წაგების შემდეგ გამარჯვებას მიაღწიეს.”
გია კაზანჯიანი – “სოხუმის” მთავარი მწვრთნელი:
“სამწუხაროდ დავმარცხდით, მართალია საკმაოდ ძლიერ გუნდთან, თუმცა “ოლიმპს” არ ჰყავდა რამდენიმე მოთამაშე და ეს შანსი უნდა გამოგვეყენებინა. პირველი ტაიმის შემდეგ ძალიან დავრწმუნდით მოგებაში და შესაბამისად, მოვდუნდით.”
