მარკოიშვილის “კანტუმ” ნახევარფინალი წაგებით დაიწყო

როგორც ჩანს, მანუჩარ მარკოიშვილის „კანტუსთვის“ ნახევარფინალში გასვლა მაქსიმუმი იყო. კანტუელებმა პლეი ოფის პირველ წრეში ვიქტორ სანიკიძის „კანადიან სოლარი“ 5–მატჩიან, დაძაბულ სერიაში დაამარცხეს და მორიგ მეტოქედ იტალიაში 1 თავით ყველაზე მაღლა მდგომ სიენის „მონტეპასკი“ ერგოთ. სიენელებმა რეგულარულ ჩემპიონატში მხოლოდ 2 მატჩი წააგეს და მეორეზე გასულ „კასერტას“ მთელი 16 ქულით გაუსწრეს.
„მონტეპასკიმ“ მეოთხედფინალში „ბენეტონს“ არ დაუტოვა შანსი, სერია მშრალი ანგარიშით – 3:0 მოუგო და ამჯერად ხელში „კანტუ“ „ჩაუვარდა“. ნახევარფინალური სერიის პირველი შეხვედრა წუხელ სიენაში გაიმარტა და მასპინძელთა გამარჯვებით – 100:73 დასრულდა.
შეხვედრა თავიდან ბოლომდე მასპინძელთა უპირატესობით წარიმართა. „სიენამ“ პირველი მეოთხედი 31:17 მოიგო, პირველი ტაიმის შემდეგ 51:37 ლიდერობდა, ხოლო მესამე მეოთხედის ბოლოს უკვე 30 ქულით – 84:54 იგებდა.
მარკოიშვილმა ტრადიციულად სასტარტო ხუთეულში ითამაშა და მოედანზე გატარებულ 30 წუთში 7 ქულა, 4 მოხსნა და 2 ჩაჭრა მიითვალა. მანუჩარმა 3 ორქულიანი სროლიდან 2 ჩააგდო, ხოლო შორი დისტანციიდან მიზანი გაუმრუდდა – 5–დან 1 ჩააგდო.
მომდევნო მატჩი ისევ სიენაში 3 ივნისს გაიმართება.