საქართველოს 3X3 კალათბურთელთა ეროვნული ნაკრები ევროპის ჩემპიონატის ფინალურ ეტაპზე ვერ მოხვდა

cover 3x3 team 2017

საქართველოს 3X3 კალათბურთლთა ეროვნულმა ნაკრებმა ანდორაში, ევროპის ჩემპიონატის საკვალიფიკაციო ტურნირზე იასპარეზა და ჯგუფიდან გასვლა ვერ მოახერხა. ჩვენი გუნდის ღირსებას ევროპირველობის საკვალიფიკაციოში იცავდნენ სუპერლიგის მოთამაშეები – ვახტანგ ქადარია, ირაკლი ჩლაიძე, გივი ბაქრაძე და ზუკა მაჩალაძე.

საქართველოს ნაკრებს ჯგუფში ძალიან ძლიერი მეტოქეები შეხვდა ესპანეთისა და სლოვენიის სახით. მთლიანობაში ანდორაში 12-მა ნაკრებმა მოიყარა თავი, რომლებიც 4 ჯგუფში გადანაწილდა. შესაბამისად, 3-გუნდიანი ჯგუფებიდან მეოთხედფინალში 2-2 საუკეთესო გადიოდა.

12-დან უნდა შერჩეულიყო 6 საუკეთესო ნაკრები, რომლებიც 7-9 ივლისს, ჰოლანდიაში დაგეგმილ ევროპის ჩემპიონატის ფინალური ეტაპის საგზურებს მოიპოვებდნენ. სამწუხაროდ, მათ შორის ვერ მოხვდა საქართველოს ნაკრები, რომელმაც სლოვენიასთან პირველი შეხვედრა 14:21 დათმო, ხოლო ესპანეთთან 8:21 დამარცხდა.

ამით, ჩვენმა გუნდმა დაასრულა საკვალიფიკაციო ეტაპზე ასპარეზობა. ჯგუფებიდან გასული 8 გუნდი კი მეოთხედფინალში დაწყვილდა და ამ მატჩებში გამარჯვებულებმა – ესპანეთმა, რუსეთმა, უკრაინამ და ლატვიამ ფინალური ეტაპის საგზურები მოიპოვეს. მეოთხედფინალში წაგებული გუნდები კი ევროპის ჩემპიონატის დარჩენილი 2 საგზურისთვის შეერკინნენ. ჩეხეთმა ანდორას მოუგო, ხოლო სლოვენიამ – გერმანიას და ორივე მათგან ფინალურ ეტაპზე გავიდა.